Жогорку Кеңештин депутаты Шайлообек Атазов «эмдөө коркунучтуу иш-чара экенин айтып, тукумсуздукка алып келиши мүмкүн » деген маанидеги пост жарыялады.

Коронавируска каршы вакцина тукумсуздукка алып келет деген маалымат чындыкка туура келбейт. Бул тууралуу Республикалык иммунопрофилактика борборунун директору Гүлбара Ишенапысова Sputnik Кыргызстан агенттигине билдирди.

Буга чейин Жогорку Кеңештин «Ата Мекен» фракциясынан депутаты Шайлообек Атазов эмдөө коркунучтуу иш-чара экенин айтып, «тукумсуздукка алып келиши мүмкүн» деген маанидеги пост жарыялаган.

«Вакцина алуу — бул күмөндүү, коркунучтуу иш-чара болуп жатат. Мага бүгүн маалымат келди. Кээ бир мекемелер мажбурлап башташыптыр. Вакцина алуу менен коронавирус жок болот деген эч кандай далил жок. Бир да лабораториядан текшерүүдөн өткөн эмес. Вакцина элибизди келечекте тукумсуздукка алып келүүсү ыктымал. Эксперимент жүргүзүп жаткан болсо, туура эмес», — деп жазды депутат.

Мындан улам редакция Республикалык иммунопрофилактика борборуна кайрылып, бул билдирүү боюнча пикирин укту.

«Кыргызстанга алып келинип, эмдөөгө колдонулуп жаткан ар бир вакцина боюнча Дүйнөлүк саламаттык сактоо уюмунун нускамасы бар. Айтайын дегеним, биз өндүрүүчүлөрдөн жана башка маалымат булактарынан дагы маалымат албайбыз. Бир гана расмий орган болуп эсептелген ДССУнун сунушу менен иш алып барабыз. Аталган уюм берген нускамаларда бир дагы вакцина тукумсуздукка же башка кооптуу ооруларга алып келет деп жазылган эмес», — деди борбордун директору Ишенапысова.

Ошондой эле ал буга чейин Жогорку Кеңештин комитеттери менен вакциналар тууралуу талкуу болуп жатканда бир дагы депутат эмдөөгө каршы пикир айтпаганын кошумчалады.
«Вакцинаны алуу үчүн каражат бөлүү маселеси каралып жатканда биз Жогорку Кеңешке барганбыз. Анда мындай дооматтар айтылган эмес. Эгер депутаттар өзү айтып жаткандай, вакцина тукумсуздукка же башка ооруларга алып келери боюнча так маалыматтар болсо, ошол далилин көрсөтүп анан айтса туура болмок», — деди адис.

Белгилей кетсек, 11-июлдан бери өлкөдө калкты жапырт эмдөө жүрүп жатат.

Предыдущая статьяТөрөбай Зулпукаров: “Сиздердин барыңыздарга Кудайдан жакшылык тилеп дуба кылам!”
Следующая статьяНазира Айтбекова: Акыркы ыштаныңарга чейин тоногондордун көр фанаты болгонду токтоткондо оңолобуз!

ОСТАВЬТЕ ОТВЕТ

Please enter your comment!
Please enter your name here